पूर्ण राईको गीत ट्रेन्डीङमा

गायक पूर्ण राई र दाजुभाइहरुको नयाँ गीत ट्रेन्डीङमा परेको छ । पूर्णको युट्युब च्यानलमार्फत हिजो सार्वजनिक स्पर्श संगीत बोलको म्युजिक भिडियो यो समाचार तयार पार्दासम्म नेपालको म्युजिक ट्रेन्डीङको १९ औँ स्थानमा छ । हिजो राजधानीको पर्पल हेज क्याफेमा आयोजित विशेष कार्यक्रमबीच गीतको विमोचन गरिएको थियो । कागज प्रडक्शनले निर्माण गरेको भिडियोमा सुलभसिं क्षेत्री र अभी साम्पाङ राईको संयुक्र निर्देशन तथा विकेश मगरको छायांकन छ । भिडियोमा एलिना रुम्दाली,अर्सीभ श्रेष्ठ,तेन्जीङ तामाङ,प्रभात आङ्बो र सरोज खालिङ राईको मुख्य अभिनय रहेको छ । आमा र छोराको प्रेमलाई भिडियोमा कलात्मक ढंगले प्रस्तुत गरिएको छ । पूर्णका यसअघि मनका कुरा, कालो सेता, ध्रुव तारा, विरामी लगायत गीतलाई दर्शक,श्रोताले निक्कै रुचाएका थिए । पूर्ण पछिल्लो समय निक्कै ब्यस्त गायक बनेका छन् । केही समयपछि अष्ट्रेलियाका बिभिन्न शहरमा प्रस्तुतिको तयारी गरेका पूर्ण र दाजुभाइहरुले केही समय अघि मात्रै दुबईमा प्रस्तुति दिएका थिए भने अझै बिभिन्न मुलुकहरुबाट पूर्ण र उनको ब्याण्डको प्रस्तुतिको तयारी रहेको छ । धरानमा जन्मीएका पूर्ण गीत संगीतमा पाएको उपलब्धि देखेर निक्कै मख्ख छन् ।