नेपाली सांगीतिक क्षेत्रका सदाबहार गायक को हुन् भन्ने प्रश्न गरे त्यसको सरल उत्तर छ राजेश पायल राई राई इज किङ १ विक्रम सम्वत् २०४७ सालबाट गायन यात्रा शुरु गरेका राई इज किङ आजको दिनमा पनि उत्तिकै व्यस्त र चर्चाको शीखरमा छन् । उनीसँगै गायनमा आएका धेरै गायक गायिका अहिले कहाँ के गर्दै छन् अत्तोपत्तो छैन् । उनी पछि गीत संगीतमा आएका पछिल्लो पुस्ताका पनि कैयन गायक गायिका पलायन नै भइसके तर सांगीतिक यात्रा शुरु गरेको झण्डै चार दशक पुग्नै लाग्दा पनि राई इज किङ उत्तिकै सक्रिय र व्यस्त छन् । देश विदेशका सांगीतिक कार्यक्रमहरुमा आज पनि सर्वाधिक माग गरिने गायकका रुपमा राजेशले आफूलाई स्थापित गरेका छन् ।गायनमै लागेर नाम र प्रशस्तै दाम कमाएका राई इज किङको नाममा कीर्तिमान को लामै लिस्ट छ । एकै दिनमा सर्वाधिक ९ वटा गीत रिकर्ड देखि संसारका सबैभन्दा धेरै मुलुक सांगीतिक कार्यक्रमका लागि पुग्ने कीर्तिमान उनैको नाममा छ । त्यसैले त राई इज किङसँग पासपोर्टको चाङ नै छ । विदेशका कार्यक्रम जाँदा १ दर्जन भन्दा बढी पासपोर्टका पन्ना भरिएका छन् भने कुनै देश त १५ पटकसम्म पनि पुगेका छन् राई इज किङ । नेपाली भाषी बस्ने कुनै यस्तो मुलुक छैन जहाँ राजेश नपुगेका हुन् । कतिपय मुलुक त उनी सांगीतिक कार्यक्रमकै लागि १ दर्जन भन्दा बढी पटक पुगेका छन् । हङकङमा सर्वाधिक धेरै २६ प्रकट कन्सर्ट गरेको कीर्तिमान उनकै नाममा छ भने दक्षिण कोरियाको आङ्गेन, न्यूज़ीलैंडको क्राइस्ट चर्च नाइजेरियाको लिस्बोन, पोल्याण्ड, स्पेनको मड्रिड, माल्टा लगायत मुलुकमा पहिलोपटक सांगीतिक कार्यक्रम गर्ने नेपाली गायकको कीर्तिमान पनि उनकै नाममा छ । राजेशलाई वर्ल्ड टोर शुरु गर्ने पहिलो नेपाली गायकका रुपमा समेत चिन्ने गरिन्छ। उनले सन् २०११ देखि सांगीतिक कार्यक्रमका लागि विश्व भ्रमण शुरु गरेका थिए । रिङटोनमा सर्वाधिक डाउनलोड गरिएको गीतको कीर्तिमान देखि एकै वर्ष चार वटा आल्वम रिलिजको कीर्तिमान पनि राजेशकै नाममा छ । अन्जु पन्तसँग गाएको सागर सरी चोखो माया बोलको गीत रिङटोनमा सर्वाधिक २ लाख ५० हजार भन्दा बढी पटक डाउनलोड भएको थियो । राष्ट्र गान सयौँ थुङ्गा फूलका हामी,क्रिकेटको राष्ट्रीय गीत, खेलकूद परिषद्को राष्ट्रीय खेलकूद गीतमा आवाज भरेका उनी सर्वाधिक धेरै भाषामा गीत गाउने गायक पनि हुन् । अंग्रेजी,जापानिज,हिन्दी, भोजपुरी लगायत आधा दर्जन बढी विदेशी भाषाका गीत गाएका राजेशले ४० भन्दा धेरै भाषामा गीत गाएका छन् । उनको किरात राई भाषाको आगामी आल्वममा २९ वटा भाषाका गीतहरु समेटिनेछन् । उनका बारेमा आउने बिभिन्न समाचार र चर्चा परिचर्चा को परवाह नगरी वर्षको आधा जस्तो समय आकाशमै उडीरहेका हुन्छन् राई इज किङ…